|
Bann delege 26yem Kongre Nasyonal Parti Lepep in reelekte Prezidan James Michel koman Prezidan Parti Lepep, ansanm avek 25 manm Komite Santral ozordi apremidi.
Prezidan Michel in remersye bann manm son parti pour sa konfyans ki zot ti renouvle an li ek son fason zestyon Parti ek pei. Prezidan Michel in osi reapwent Myse Danny Faure, koman Sekreter Zeneral Parti, avek konfyans ki i pou kapab kont lo sipor Msye Faure dan son travay pour zestyon Parti ek pei.
« I en loner pou servi zot ek lepep Seselwa an antye. Koman Prezidan Parti e koman Prezidan Sesel mon donn zot langazman ki mon pou kontinnyen devoue tou mon lafors ek tou mon kouraz pour amelyor byennet nou pep, pour lavenir nou zanfan, pour progre Nouvo Sesel. Mon pou kontinnyen travay dir pour nou Sesel, » Prezidan in dir.
Prezidan in note ki nouvo Komite Santral i en ki razeni, avek bokou plis nouvo manm zenn Parti, e osi en melanz avek bann ki pli eksperyanse.
« Sa bann zenn ki fek ganny elekte i’n aksepte en gro defi o non Parti e dan lentere pei: met Sesel avan tou, e travay dir pour nou patri, san lanbisyon personnel, san konsiderasyon pour gen personnel. Mon felisit zot salerezman pour zot eleksyon. Mon remersye zot senserman pour aksepte sa defi, sa gran responsabilite, pour nou Parti, pour nou Sesel. »
Myse Michel in osi felisit bann manm k’in ganny reelekte.
“Zot reprezant kontinnyite dan sanzman. Nou kont lo zot, lo zot leksperyans, lo zot matirite, lo zot bon legzanmp, pou gid e oryant bann zenn ki fek ganny elekte lo bon semen ki nou’n trase ansanm. Mon ensiste lo lenportans legzanmp personnel tou manm Komite Santral.”
Kongre in elekte bann manm Komite Santral swivan, dapre lakantite vot ki zot in gannyen;
- Danny Faure
- Jean-Paul Adam
- Vincent Meriton
- Joel Morgan
- Peter Sinon
- Olsen Vidot
- Marie-Louise Potter
- Marie-Antoinette Rose
- Mitcy Larue
10. Lise Bastienne
11. Macsuzy Mondon
12. Christian Lionnet
13. Rolph Payet
14. Charles Bastienne
15. Vaithinathaswamy Ramadoss
16. Idith Alexander
17. Joel Melanie
18. Simon Gill
19. Dolors Ernesta
20. Dan Frichot
21. Sebastien Pillay
22. Bernard Shamlaye
23. France Bonte
24. Hugh Payet
25. Merida Delcy
Msye Dolors Ernesta pa ti prezan pour sa kongre.
Nouvo Komite Santral Parti Lepep i 13zyem komite depi formasyon SPUP ek SPPF.
|